စာရေးသူတို့သည် ဘုရားကျောင်းတော်ကိုဝင်ရောက်ဖူးမြော်ခဲ့သည်။ထိုအခိုက် ဘုန်းကြီးက ဆက်လက်ရှင်းပြသည်။ဘုရားကျောင်းတော်သည် မဟာပရိနိဗ္ဗာနစေတီတော်၏ဘေး၌တည်ရှိသည်။
ရုပ်ပွားတော်မှာခြေဖ၀ါးမှဦးသျှောင်တော်အထိပေ၁၀ရှိသည်။မြောက်ဘက်သို့ ဦးခေါင်းတော်ပြု၍ အနောက်ဘက်သို့ မျက်နှာမူကာ ပရိနိဗ္ဗာန်စံတော်မူပုံဖြစ်သည်။
ပခုံးတော်၅-ပေ၆လက်မရှိပြီးညောင်စောင်းတော်မှာ၂၃ပေ၉လက်မရှိသည်။ရုပ်ပွားတော်ကိုရွံ့ကိုမီးဖုတ်ကာ
ထုလုပ်ထားသောပုံဖြစ်သည်။
၁၈၃၃-ခုနှစ်ကရုပ်ပွားတော်ကိုတစ်ပိုင်းတစ်စစီတွေ့ရှိရသဖြင့်ပြန်လည်၍ဆက်စပ်မွမ်းမံထားပြီးညောင်စောင်းတော၌
ဆေးဆရာဇီဝကပုံ၊အာနန္ဒာပုံ၊သုဘဒ္ဒရဟန်းပုံတို့ကိုထုလုပ်ထားသည်။
ဤရုပ်ပွားတော်ကို မထုရာပြည်သားဒိနဆိုသူက ထုလုပ်သည်ဟုသိရသည်။
အက္ခရာနှင့်စာရေးသားဟန်အရအေဒီ၅ရာစုကဖြစ်သည်ဟုယူဆရသည်။ထိုရုပ်ပွားတော်ကြီးအား
မဏိတော်ဘက်ဖူးမြင်ပါက ပြုံးနေသည့်ဟန်၊ခြေရင်းဘက်မှဖူးမြင်ပါကဝေဒနာကိုသည်းခံရှုမှတ်နေသည့်ဟန်နှင့်
မျက်နှာတော်တည့်တည့်ဖူးပါက ကျိန်းစက်နေသည့်ဟန်(၃)မျိုး ဖူးမြင်သည်ဟုဆိုပါသည်။
စာရေးသူတို့လည်းဘုန်းကြီးရှင်းပြသည့်အတိုင်းဖူးမြင်ခဲ့ရသည်။ခြေတော်ကိုဦးခိုက်ပြီးအကြိမ်ကြိမ် ဖူးမျှော်လို့မ၀ပါ။
စာရေးသူတို့သည် ကျောင်းတော်ရာတွင် (၁)နာရီခန့် ဘုရားရှိခိုး၊မေတ္တာဘာဝနာပွား၍တရားအားထုတ်ကြသည်။
ဖူးမြော်နေသည့်အခိုက် ရင်ထဲတွင်
ဝမ်းနည်းမှုမျိုးစုံ ရင်နှစ်စုံကိုထိခိုက်စေတော့သည်။မျက်ရည်ဥတွေပုလဲလုံးဖွေးဖွေးနှယ် အလိုလိုစီးဆင်းနေမိသည်။
မြတ်စွာဘုရားရှင်ပရိနိဗ္ဗာန်စံဝင်သွားသည်မှာ နှစ်ပေါင်း(၂၅၀၀)ကျော်ခဲ့ပေပြီ...။
မြတ်ဗုဒ္ဓ ပရိနိဗ္ဗာန်မပြုမီ နောက်ဆုံးမှာကြားခဲ့သည့်သြ၀ါဒစကားကို သတိရ၍ နှလုံးသွင်းမိတော့သည်။
ဟန္ဒဒါနိ ဘိက္ခဝေ အာမန္တယာမိဝေါ
ဝယဓမ္မာ သင်္ခါ၊အပ္ပမာဒေန သမ္ပဒေထ။
ချစ်သားချစ်သမီးတို့ ယခုအခါ နောက်ဆုံးသြ၀ါဒကိုမှာထားခဲ့ဦးမည်။
ကံစိတ်ဥတုအာဟာရတည်းဟူသော သင်္ခါရတရားတို့သည် ဖြစ်ပြီးလျှင်ပျက်ကုန်၏။
ထို့ကြောင့် ဒါန၊သီလ၊ဘာဝနာတရားတို့ကိုမမေ့မလျော့ဘဲ နေရစ်ခဲ့ကြဟု မှာကြားပြီးပရိနိဗ္ဗာန်စံဝင်တော်မူခဲ့သည့်ပုံရိပ်ကို ထင်မြင်လာသောအခါ
တားမရသောမျက်ရည်စီးကြောင်းက မျက်နှာပြင်မှာနေရာယူတော့သည်။
ရင်ထဲမှာဝမ်းနည်းမိသည်။မြတ်စွာဘုရားရှင် ပရိနိဗ္ဗာန်သွားတဲ့အချိန်မှာ သောတာပန်းရဟန်း သကဒါရဟန်း နှင့်ဒကာ၊ဒကာမတို့၏ ငိုကြွေးသံကဘ၀လျှံအောင်ဖြစ်ခဲ့သည်။
ပုထုဇဉ်တို့မှာ ငိုကြွေး၍မေ့လုမြော၊သတိလွတ်သည့်အထိ ဖြစ်ခဲ့သည်။
မွေးဖွားခြင်းနောက်ကွယ်မှာ သေခြင်းတရားပါလာပြီးသားဟု သံဝေဂပွားမိလေသည်။
No comments:
Post a Comment