1
LAWG (1)
GAOX NGHOX
Gaox nghox māwh si niag nēx nham: son kawn: pui, gaox
nghox māwh pa ih ex kawn: pui ku ngāix ku sawm:, māwh pa
ceei: ex ju tix son sang im: ex piang hak tiex heue.
Ex kawn: pui phan: gaox nghox ang:koe: ang:
ex chix klawd tix māwh sim: im: tix māwh
pui heue. lheu: khaing: in: son kīh ih mau cai:
ex kawn: peeng nang: tix cōh māwh mau
cai: tai pak tix, exkawn: vax ang: ex hiex
tawng tix yūh laih lai awm: pui tang ceu, kraung ceep mau cai:
ex du ngie piang gaox nghox tix yieh son 90% son khaing: heue.
Māwh kheu: nin: gaox nghox māwh pa kied ting buan: son:,
son ex yūh nin: ex caw tix sau: riang sau: rao tix sum: van: gaox
nghox ku kaux . lheu: khaing: an: ex kawn peeng lig ia: law
brung ih moik, ih kam: nghox, ka: sivoe in: dīx, ex shiao: krak
moi teem: tix yūh kaing jhaw:, ang: tawng tix chix shiao
ngau(phon:) sau: kawx riang tix mie ding kawx, ca: māwh ngie
uik riang nai: kaing ang: yāox tix pon to:dee keung: ex tix pon
heue. can kawn: pui ot piang gawng piang lua pa ang: koe: ping
nyia cu: yi: pau dēuh rhawm: tix ka bāux yam prāix klawng:, jao
in: si ngaung kaing saing:nghox pa yūh ex, ex sum: nai: grai:
riang ka:tix mie nyao heue.
Ih riang jung pui mai: krak, krax haok krax huan:, ang: koe:
heue.
Ex kawn: pui pa ot piang gawng piang lua, phan: ex van:
kawn: nghox dee yawm phan: ang: koe: tix khix plak, tom: hoek
ra: khix ang: chix tix sum: heue. phan: kawn: nghox ang: hoek
khix sigāix tix, nghox pa sum: ex an: ang: sok tang: heue. yam
an: phan: sum: simie nghox (1) glawm: pau pon nghox (15)
glawm: tom: hoek (20) glawm:, yam in: pui pa koe: ping nyia cu:
2
yi:shiao cag thai:, mai: tawng tix chix shiao ngau phon: ku ceu
ku cawng, nghox pon pui kied daing: nie haok nie huan: jao
tawng pui tix sau: ngau phon: ku ceu ku cawng, mhawm:
gawng:, mhawm: plix mai: mhawm: lhax heue.
Phan: uik simie (1) glawm: pui pon to: (100)glawm: heue.
Māwh kheu: nin: son ang: riang rao ex nai: nawk, ex caw tix
hawt daux krax pa thong: bong: pa jhi: cub caw plak sum: van:
son ngaox heue.
Gaox nghox doh yūh krax
Brax kua: kaoh khaing: gaox
Gaox ang: koe: awm: kawn: doe.
Koe: gaox sawm: awm: simiang.
Paw tik paw prah sum: nghox khawx.
Tawx dee mawx pui awx dee an:.
LAWG (2)
GRAWNG EEI: IA:
Ia: māwh to: sat pa eei: kawn:
pui ka tix ceu. ia: jiet chix tawng
bawg yam awm: ex kawn: pui,
yam ang: nari nyiang koe: dīx,
kawn: pui krox tix mhong: yam
ux ia:, voe bīh riang prāix, ia: ux
3-4 bawg, khaix an: prāix tom:
tag riang heue.
Ia: tix ngāix ux (4)bawg, ia:
peeng ex kix māwh cao: so: tix
kaoh, ex peeng tix ih nēx, ih
tom: kix, phan: māwh ia: koe:
ra: ceu, tix ceu māwh pa chix num tom: cao: tix, ra: ceu māwh ia:
3
tom: bhaung: heue. ia: kied koe: buan: son, son pui saux ngia,
pui saux, pui pa ang: kub nēx nham: phan: yāox tix cao ih nēx ia:
tom: ia: kix phai: deeih nēx nham:, phai: kluing, phai: koe: riang
rao, kheu yāox tix ih nēx ia: heue.
Ia: ang: deuk ngie ih nēx kawn peeng tix cōh cao: ia: mai:
tom: kix, ex kawn: pui, kawn yūh taoh yūh sawm: shiang:,
sawm: mau ka tix blah heue. phan: ex sang yūh krax lu krax tan,
ex jāh tix shiao ia: si voe. ia: māwh nēx pa yie tix rhaoh son ex
kawn: pui heue.
Sau: riang eei: ia:, saux yha: māwh ia:.
Kia: saux, taux lhaux plaux ka ia:
Hoek nyo, po: sim:, to: liag ia:
Jhawm: nyawm rawm: ia: lheu: khaing: sia:
Kia: saux, kia: yha: vīex phak ia:.
Hot cha: eei: ih ia: dia yūh ot.
LAWG 3.
SIMIANG PA MHAWM: RHAWM:
Dīx dīx koe: simiang ting tix
kaux ang: sa: gut sa: kheem:,
yax yeen, map nai: tix ih kawn:
rai peu sin: tix heue. si diex
pui yūh tix ih kaing jhaw:,
yūh tix kub sawm: nyawm ot
ku kaux daux pui paw tang:
lox six yox moing, khaing:
pāox tix, bre tix yūh sa: tixka pa ih nai: cai:
haoh, si: diex gau pui yūh nin: heue.
An: tix ngāix nawh yūh tix awm: peu sin: mai: laig laih, son
sang tawng grawng kraung ceep eep sawm: pui daux hak tiex
giex kuang: tix heue. Simiang an: ceep kraung pa cāox pa hoik
4
griah, mai: chawk tix liag man: luat man: pre pa kied ting ngāwh
ting jum, pui cao: cōh kraung an: yāox kraung ceep nawh mai:ah
nin: ka simiang an: “hu: hu:”maung māix pui yūh nin: ang: doh
dud tix pon liag ceu kraung ting ngāwh ting jum yūh nin: ah nan:
ka simiang an:, mai: grheu simiang an: to: heue.
Tax simaing an: ang: nye: ang: nyux, nawh nyīah khawm: ah tix
nin: “mhawm: mhawm: aux lawk ing: heue.
Nawh hoek ka tang: kaux pa cōh nang: kraung ngāwh, kraung
pa ting jum awm: pui an: phao:voe nux heue, pui an: ah nin: ceu
kraung in: phan: ang: māwh ceu laux simiang mai: pui pa mag
mi khri: mau, ang: pon liag, kheu caw kraung pa ting ngāwh ting
Jum, māwh kheu: nin: māix hu: tang: dah sawg māix liag pa yie
ngāwh ceeix awx.
Tax simiang an: pawk lox cao: cōh kraung an: ah nin: lāoh lie
ting buan: son: ka lox krai māix ka aux, aux ing: ha: awx.
Si nax ra: loe: ngāix si: miang an: kok simiang ot greem: tix
krai lao kix mhong: pa hoik yāox tix, mai: sidiex ka kix awm: in:
plak greem:.
Rawm: loh diang simiang thai: cao:.
Paw nīeh ka pui hot, paw cot ka pui saux.
Paw nyiah ka mi, paw khi ka hot.
Paw nīeh ka kawn: doe:, paw rhoe: ka pui loeg.
Rāuh te pui tom: krox puing: klang:, lang: rhawm:.
Pui tom: mhawm: prawng prāix.
Pui ting tu, pu rhawm: ang: lang ju.
Lox in: een: ka niex praix daux rhawm: pex ku kaux awx.
5
LAWG 4
RĒEH TAWNG BUAN: SON:
Dīx dīx koe: lien: tix kaux yam
hu: laig laih, nawh yāox cao:
cōh kawn: rēeh tix mu: mai:
liag kawn: rēeh an: heue.
Yam hoek lien: an: daux nyiiex
tix, nawh sau:kawn: rēeh daux
ngoi, kawn: rēeh an: ting tix ngāix
khaing: tix ngāix, lien: an: kied
daox deng: ka, pie daux alīah
singāix, ting huan: sidu pon ba: ex kawn: pui heue. Lien: an:
jhak ka rēeh, nawh kied cee rhawm: ka yāox tix mai: hu: ploi:
rēeh an: daux klawng: ting heue.
Viang nawh kied moh kawx rēeh an:, dee sidāh nawh ploi:
ka rēeh heue.
Ang: lai awt rheung glang: mawx tix naing tāoh daux hak tiex
ot lien: an: pui hak tiex an: khawm: uik to: son sang lawd luan:
khaing: krax yum, si voe pui to: khan: kix koe: rawm: klawng:
ting tix klawng:, son sang ang: kix man: pui cāox kuan kix daux
diang klawng:, yam an: pui to: pui tua khan: kix taing tix laig
daux rawm: pui plak nie yum daux rawm: an: heue. Ka daux pui
an: kix lien: pa ploi: rēeh liag tix, ka vīex ka daux kix, yam
nawh cod daux rawm: nawh mhong: tum: caong tix piang rang:
daux rawm:, nawh bre tix jhak, yāox cung tix piang rēeh paing
tix mu: heue. Rēeh paing an: vīex nawh tiang klawng: plak an:,
dee ang: pui koeng lai pon hoek, lien: an: yaog tix līh piang tiex,
rēeh yaog kaing: tix loi loi mai: deeih gi tix jhak ka lien: an:
heue.
Khaix an: rēeh koi deeih laig daux rawm: nawh ca: gi pot tix
jhak ka lien: an: heue.
6
Ex pa māwh kawn: pui ja lao ex ang: yūh tix tawng buan: son:
pa yūh pāox tix, pie rēeh pa māwh to: sat chix tawng tix pawk
buan: son:, phan: pui yūh kaing pa mhawm: piang ex, priex
daux rhawm: khrawm: mai: kaux tix awx. Pui pa tawng buan:
son: ang: doh yāox krax lāux.Gāux rhawm: yūh kaing mhawm:,
tawm: lox ih rhawm: rāuh rhawm: see, eei: ka kaux, saux ang:
yāox.Pui ting ngawg, kawk rhawm: ang: lang: ju.
LAWG 5
GRAWNG SI NGĀIX.
Singāix māwh ceu pa ang: koe: mu: koe: lon: awm: koe: cie hak
tiex, singāix māwh ceu pa hax pa koek awm: ngu, singāix mai:
hak tiex singai khaing: pāox tix dim: lan ra: lag dim sien: lhak
heue.
Ex kawn: pui keud singāix iak khaing: hak tiex, viang māwh
nan: singāix kawn lheu: ting khaing: haktiex heue.
Singāix māwh pa koe: buan: son: ka piang hak tiex, can pa im:
ju piang hak tiex māwh kheu jao pa riang singāix si u: singāix
tom: yāox tix im: ju heue.
Māwh kheu: jao pa hak pa koek singāix rawm: tom: līh tix
māwh bhawm: māwh meet, tom: tīeh tix māwh pai: awm: piang
rao ma: khaix an: yam si pub ka bhaung: leet, bhaung: si kied
7
tom: lih tix māwh lhiex, māwh kheu: pa hax pa koek singāix tai
khan: kix mhawm: lawm: jhawm: griang chix līh tix koe: heue.
Plix khaox, plix ox, nghox khawx, chix ting chix teem māwh jao
singāix, lheu: khaing: an: kheu: pa riang singāix ex kawn: pui
yāox krax nyawm ot siu: koe: brax kua: ting huan: heue.
Sngāix jhan: riang piang hak tiex.
Nyiiex yaong: hun: prīex kun: hak tiex.
Priex khrawm: mhawm: yāox jao singāix.
Singāix jhan: riang. Lheu: khaing: shiang:.
Simiang piang tiex māwh singāix.
Singāix tix diang liang leeing ju.
Tai lawm: mhawm: pruh jao singāix
LAWG 6
KĪH
Kīh māwh pa sidaing:koe:
buan:son:, son ex kawn: pui mai: to: sat
ku ceu ku cawng te te, viang māwh
nēx māwh puan: taux lhax phan: ex ang:
sau: kīh ka daux, viang māwh pa ah ex
nēx puan:, ceet ciang mai: baik ngie
heue. Kīh ang: jhoeng: māwh ngie
nyawm yūh taux lhax puan: nēx,
prīex preem nong: nong:, kawn baox kīeh nang: ex kawn: pui
mhawm: nēx nham: singax singēh kaux hak, joh jhaung: krax
brax kua: ex kawn: pui heue.
Pui pa yūh kaing nu, pui pa mawn riang rao tix, kheu:
sidaing: līh lauh kix caw tix lheu: ih kīh khaing: pui tang: kaux,
viang māwh kawx nin: phan: ih luan: khaing: diag tix ex chix
pon jhawm: saux haok nham: ka heue.
Nēx ku ceu son sang ang: cūx sium: mai: rheung: tix een:, phan:
8
ex ang: sau: kīh ang: chix, phan: saux ghok, saux rhang: phak ka
rawm: kīh chix moi: chix nghie: ka, kīh māwh ceu pa pēx ceu pa
cūx pa sium: heue.
Ang: jhoeng: māwh ex kawn: pui pa moh tix ih kīh nong: nong:
pie to: tiag to: tu, khawng: ceei: brie liang ex, kix ka miag ka kīh,
phan: māwh dee kāoh kīh tix blah pui teei khaing: daux gawng:,
tix blah, dee khien: dee lāoh rawm: pang: lai: pui ka teei kīh kah
heue.
Sium: yum rham:, nēx nham: yawm.
Ih kīh chix līh koe: riang rao.
Krāwx rham:, kham: geu ceu saux rhang:
Lung lang: rawm: kīh chix moi: yūh.
Nēx nyawm kheu kīh khix lah jao ngu.
Nēx ang: koe: kīh māwh taux
Saux ang: pai: māwh yum.
LAWG 7
PAW IAK NGAI: GAIG PIANG PĀOX TIX
Dīx dīx koe: kang koi tix mu: hu: lai ling tix sawg pa ih pa
un:, kang koi an: jiet si pub rēeh tix mu: koi hu: loi loi, kang koi
ah nin:, mīex maung hu: māix in: māix tom: doh yāox hoek ka
dee sang hu: tix yam mawx in: lie?
Rēeh pawk lox kang koi mai: ah nin:, “HE” māix paw iak
9
gaig ka piang pui awx, sang kīeh māix ax lah tix to: hoek ka
piang gawng tieh lie? “ HA: HA:” maung māix pa ang: pon hu:
yūh nin:, nieb pon hak aux si lah to: chix –ceu māix pa ang: tie
dud tix pon hu: phai: awm: pāox yaong: tix, hak ax si lah to: ax
jāh phao: awx, 1,2,3, to:, kang koi ka daux tix vud hoik singai
luan: khaing: rēeh tix miex nyao, kang koi keed ah nin: daux
rhawm: tix ang: rēeh pheem: in: doh tau tix krup ka aux, aux
laux tix tin: mai: it tix vud ha, rēeh hu: cie tix loi loi, ang: lai
laux lee tix, nawh tom: pon tix hoek si voe kang koi piang
gawng heue.
Khaix hoik sak it kang koi, nawh siduat mai: kaoh yaog tix
to:, haok piang gawng, yam hoek kang koi piang gawng yāox
hoik ot rēeh sivoe tix, kang koi sidaing: kaig ka rēeh te te heue.
Kang koi keed daux rhawm: tix ah nin:, aux ce: tix māwh
pa lāoh pa lie, pa lhak pa lhiao: khaing: pāox tix, kox man: tix
iak ngai: gaig piang pui tang: kaux, ang: tie awm: pa keud pa ce:
aux, in: kied māwh krax kaig tua son aux te te heue. Kang koi
tawm: lox ah nin: pāox grawm pux aik kawn: keeing: pa moh
aux khan: kix, ting ang: ah iak ang: ah, phai: ang: ah, nhim: ang:
ah, paw vi iak gaig ka pāox ex awm: aux liak awx. Aux ang: lai
keud lai sawn: rhawm: tix nieb ce: tix lāoh khaing: pui, jao in:
aux pon krax kaig ngai: ka heue.
Paw keud tix lāoh khaing: pāox tix.
Cāox griang mhawm: riang ang: pon tiang.
Kang koi viang phai: grai: kaux ka hoi.
Toi: klawng: gawng pui ang: tie tawng.
Hoi: koi lawng krax, brax hu: khaing: nawh.
Viang māix phai: caong phan: ang: sau: riang.
Diang hu: māix lud, dee cud māix māwh an:.
10
LAWG 8
GRAWNG KHIX KHRAOX.
Ex kawn: pui yam jāuh khix
tix haok keud māwh jāuh tix
haok plak klip si ngāix, viang
māwh nan: ang: tie māwh awm:
pa keud pui tix heue.
Māwh kheu: caw khix tix
hu:plak pon ngāix piang ex,
kheu: jhan: riang singāix ex
tom: ang: chix yāox khix,
tom: singāix hoik laig, ex tom:
tag yāox khix, yam an: haok
khix tix som: tom: ah ka heue.
Yam an: nawh deeih vid
si vawg tix plak līh singāix,
jee khix deeih khix tix som:
nawh deeih vid si vawg plak klip singāix hoek tom: yeet tix
heue.
Haok khix 15 som: ex ah pang: khix ka yam an: khix jiet
lawm: le awm: bia: keem gaox heue. Phan: hoek 30 som: ex
plak līh singāix ang: lai chix yāox khix, yam an: ex ah yeet khix
ka heue. Yam an: khix tom: caw tix pang: ka meung pa ot plak
klip singāix, yam yeet khix ka plak klip singāix, caw tix pang:
ka ex plak līh singāix heue.
Yam caw khix tix laig sinax haktiex kiex singāix boe hak
tiex caw tix thawng: daux khix yam yūh nan: khix jāh tix faik
kawn: pui tom: ah pom praog khix ka heue.
Kheu: koe: khix ex kawn: pui tom: tawng tix sawn: singāix,
khix, num, tix num koe: 12 khix phan: ang: māwh nan: koe: 365
singāix heue.
11
Khix pa riang simiang pa mhawm:.
Khrawm: ex klieh vung viang: pang: khix
Riang khix khraox jhaox khrawm: tix graoh.
Khraox kāoh kix, khaing: bīx tix ma:.
Haok nyiiex paox maox vien khix.
Khix mhawm: paing daux sawm: kao: phuan:.
Khrawm: ex pāox tix daux nyiiex pex.
Yiiex kuad sinaw ah lox leng.
LAWG 9
PUI KID KHAOX RĀUH SEE.
Ka daux tix singāix cao: kid khaox tix kaux kid khaox
praok klawng: ting, yam kid nawh khaox nawh man: moe: tix
kreuek daux rawm: heue. Cao: kid khaox an: son sang deeih
yāox nawh moe: tix cu: ca: tix sawg daux rawm: yūh ka mawx
kawx ang: yāox moe: heue. Dee nghoik cao: kid khaox an: dah
rhawm: mai: tu kap tix ngawm praok klawng: dee kreuek moe:
tix mai: ah tix nin: hoik aux tix ih phao:.
12
Cao: kid khaox an: yiem yo jao grai: moe: kid tix khaox,
yam an: phi: cao: pau ka klawng:, mhong: lox yiem cao: kid
khaox an: mai: phi: an: hoek ka nawh, chawk nawh ah nin: pui
kid khaox, yiem māix mai: dah rhawm: māix kheu: pa tix lie?
Kreuek moe: aux daux rawm: aux tom: yiem jao, nawh pawk
lox phi: an: ah nin: heue. Yam an: Phi: pau rawm: teei moe:
khri: jhi: pui kid khaox an: yāox, māwh in: moe: māix lie?
Nawh pawk lox ka phi:an: ah nin: ang: māwh moe: aux pa
kreuek daux rawm:,moe: aux māwh moe: rhiem: phi: an: bāox
deeih jhi: nawh yāox moe: mau, pui kid khaox bāox pawk lox ah,
ang: māwh moe: cie tix, dee nghoik phi: an: bāox deeih jhi:
nawh yāox moe: rhiem: pui kid khaox an: gāux rhawm: khawm:
pawk tix lox phi: an: mai: ah nin: lāoh lie ting buan: son:, in:
māwh moe: pa grai: aux heue.
Phi: cao: pa pau ngom rawm: an:,khaw rhawm: ka lox
pawk pui kid khaox kheu: māwh lox rāuh lox see, nawh tawx
moe: khri: moe: mau hoek khawm: moe: cao: kid khaox an: ka
nawh khawm: loe: mag heue.
Pui kid khaox an:, nawh krai pui mhong: grawng in: daux
yaong: uik heue.
Yam an: koe: pui daux yaong: kix tix kaux mhong: grawng:
an:, nawh yūh tix hu: kid nang: khaox praok klawng: an:, nawh
yūh tix lu lied man: moe: tix daux rawm: mai: yūh tix yiem grai,
riag yo, yam an: phi: pau klawng: hoek mai: chawk ah nin:, riag
yo māix jao pa tix lie? Pui an: pawk lox ah nin: kreuek moe: aux
daux rawm: yam kid aux khaox in: nūx heue.
Yam an: phi: sut moe: khri: daux rawm: mai: chawk pui an:
ah nin: māwh in: moe: māix lie? Pui an: pawk lox dom mawx
dom an: “māwh māwh” ah lox pie lhen: yūh nin: ka phi: pau
rawm: an:, yam an: phi: tawng māwh lox pie lhen: lox ang: rāuh
see phi: an: giex moe: khri: mai: grai: tan:, pui an: jalao pon moe:
13
khri: moe: mau, pie moe: cao: nawh ang: lai yāox, kheu: kawk
vawk, ang: rāuh rhawm: rāuh rhi: heue.
Pui ting ngawg vawk rhawm: ang: mhawm: ot
Pa rāuh pa see, dee hu: ang: die.
Simie ceu tix, chix pon uik.
Pui tīeh lu: lieh dieh yūh ot.
Pie lhen: ka pāox yāox krax kaig.
LAWG 10
SIMIANG PRAWNG RĀUH SEE
MAI: KAWN: NYAWMPA KOE: CU:YI: TIX KAUX.
Dīx dīx koe: Tax cao mi tix kaux mai: Tax kuad hot tix
kaux mai: kawn: nyawm gau lai pa koe: cu:yi: tix kaux.
14
Tax cao mi an: mai: Tax kuad hot an: caw tix dēx nyiiex tau
Tax kuad an: koe: brung mīex tix mu: mai: caw tix nghe: awm:
nang: an: Tax cao mi ka koe: nang: moi mīex pa caw tix nghe:
tix mu: heue. Daux bawg yam som: tix mu: brung mīex Tax
kuad an: mai: moi mīex cao mi brieb tix kēh yam tau heue. Tax
kuad an: ang: laig it leeing: som: simie prāix nied tix riang kheu:
simie tix yāox ngai:kawn: brung tix heue.
Tax kuad an: kaoh cao cao līh jhak kawn: brung kēh cie tix,
yam an: nawx kied daox deng: ka yāox tix it kawn: biex mai:
brung mīex cie tix, te te māwh pot Tax cao mi an: pa mox tix
brīex kawn: brung mai: hu: dēuh mai: moi mīex cie cao: tix, teei
kawn: moi biex cie tix hu: dēuh mai: brung mīex cie Tax kuad
hot an: heue.
Tax kuad an: sawg kawn: brung cie tix yāox ot daux
kawg cao mi mai: moi mīex kix, Tax kuad chawk Tax cao mi an:
ah nin: yūh ka mawx māix nieb brīex kawn: brung cie aux dēuh
mai: moi mīex māix lie? Tax cao mi an: nyīah mai: pawk tix lox
Tax kuad an: khawm: ah tix nin: hoik māwh son: brah son: yawk
māix, ang: brung saux kēh moi ang: moi saux kēh brung, in:
hoik māwh mhawm: son: aux cao mi, moi mīex aux tom: kēh
kawn: brung ang: māwh lie?
Yam an: Tax kuad hot hak kiex hu: kao: ka simiang ting,
Tax cao mi an: brīex tawx mau cun: praok ka simiang an: heue.
Simiang an: prawng yūh ka mawx kawx ang: plak pui
mawx tix tie cu tix gōh grawng: an:, simiang an: ang: lai tawng
ka pa sang yūh tix, tat lox ah nin: ang: pax tie cu tix nghiet lox
aux, haok khix dim: dim: som: pon ngawb dim: taix pax deeih
vīex pāox tix hoek tin: dee ot aux, nawh tawm: lox ka kiex ah
nin: heue.
Tax kuad an: kied dah rhawm: voi rhawm: khawm: ing: tix
ka nyiiex, yam an: Tax kuad sipub kawn: nyawm gau lai tix
15
kaux, kawn: nyawm an: yāox ing: Tax kuad khawm: dah rhawm:
tix nawh chawk ah nin: Tax, awm: pa ang: māix hiex nyawm
rhawm: nix lie?
Tax kuad an: pawk lox ah nin: “māwh heue”daux som: tix
mu: brung mīex aux kēh, moi mīex cao mi dēx nyiiex aux ka
kēh, cao mi an: brīex yaog kawn: moi cie tix hu: een: mai: mīex
brung cie aux, nawh teei kawn: moi cie tix, een: mai: brung
mīex cie aux yiex tom: kao: ka simiang, ang: nyiang cu tix dud
ah lox tix, simiang deeih mhaing: yiex hoek khix dim: dim: som:
mai: dim: taix heue. Aux tau rien tix som jao ang: aux yāox tix
tawx mau cun: praok ka simiang an:heue.
Yam mhong: kawn: nyawm grawng an: nawh ah nin: ka
Tax kuad an: “Tax” paw awt yūh māix khi:, son in: ang: cāox,
phan: hoek ngāix an: sax, yūh māix lha: hoek khaix Tax cao mi
an: phan: simiang chawk māix ah nin:, yūh ka mawx māix nieb
lha: hoek yūh nin: lie? Māix tom: deeih pawk lox nawh ah nin:
“ māwh heue” Tax simiang, yam hu: aux, aux hoek daux diang
klawng: aux yāox hax mhaik, aux tom: kin rawm: ka yau, mai:
yūh lung preet tix ngu ka, ngu tom: taug yeet aux lha: hoek jao
heue. Yam an: simiang teu ah nin: ka māix yhot māix ang: mawh
lie? Piang hak tiex ang: aux sax mhong: hax mhaik mai: kin
rawm: daux yau, “māwh heue awm: pa ah tax simiang tix”
piang hak tiex yie sax mhong: ex nang: kēh brung mīex kawn:
moi lie? Moi mīex kēh kawn: brung lie?
Yam an: Tax simiang an: ang: lai tawng ka lox sang pawk
tix, simiang keed rhawm: tix ka lox krai Tax kuad, māwh lox
rāuh see simiang an: sux ka cao mi an: mai grheu: nawh ing:
heue.
Ex kawn: pui kaing ceu pa tix ang: ah, phan: māwh ceu
pa māwh ah māwh, phan: mawh ceu pa ang: māwh ah ang:
māwh awx. Paw kham: mhai: sag se pa ang: māwh ang: mēh
16
son pāox tix liak. Kawn: nyawm in: phan: ang: gau lai nawh ka
ang: doh tawng tix gau Tax kuad an: yūh nin: heue. Paw nīeh
paw cien sau: riang rao tix gau lai yam koe: bawg yam son ex
awx.
Phan: koe: cu:yi: ang: doh khi:
Fi: fang: dee mawx nawh kawx cu.
Ngu cu tu daw caw daux krax.
Paw khin: tix yūh tuih yūh krax ot.
LAWG 11
MEU BĀUX JU HAK TIEX VAX.
Meu bāux ju hak tiex Vax koe: (3) bāux ex kawn: Vax jāh
tom: si ngien rang: sigang: līh kaw: tiex tix loi: kaw: moi tix
bāwh kaw: raix tix pang: kaw: rang: tix peem: ex hoik dawg
māwh ceu pui pa koe: piang hak tiex nang: heue. Ex ka hoik ao:
min: ting ceu piang hak tiex, ex ang: saux sawg tix cax hak tiex
nyiiex yaong: ot pui tang: ceu tang: cad ex tang: dawg yūh tix ih
ma: tang: tix yūh kaung: pawng rawng nie, lox pa ah tax yiex
mīex keeing: ex ka in: hoik ot nang: daux tong daux ce dīx,
māwh kheu: lāux ex ka naing, ex tom: phru phrat tix ot ka
gawng piang lua, tang: ot tang: koe: khaing: pāox tix, bawg yam
an: māwh moeg, māwh kuad lang: simiang ting, kuad kie: krawx.
kuad eeng, sipug ru, pagiex kuang: piang ex, kawn koe: cao mi
ting tu pu rhom: pui tang: yaog tix ting ving tix vīeh, grhang:
hak tiex ka pāox tix, puing: naing graing cāox ex kawn: rai peu
sin: ang: yāox tix nyawm ot singēh koe: jao heue.
Kawn: pui hak tiex kha: rhom: son kraung ceep eep sawm:
rawm: nyāux kīh ih mau cai tix te te heue.
Sivoe 1969 num hoik koe: mie rheng: mie mheen: ju
mawx nieh, ang: ex lai uik simin, ex kawn: Vax tang: ot si yut
koe:, ang: pon laig līh lai ling ing: tiang dee ot pāox tix jao
17
puing: puah kuad prim: ka pāox tix ang: jud ang: jai heue.
Yam an: pui tang: ot tang: koe: kaung: mawx kaung: an:,
eeng mawx eeng an: ang: doh pon hoek dee ot pāox tix pui hoik
tang: tat tix dēuh meu hak tiex sinax pāox tix, ang: pon tix cax
prāix sawm: klawng: nyāux hak tiex brīex brum pāox tix tang:
lox sikah ex kawn: Vax khaing: pāox tix, tix ceeix, grawng
māwh yūh nin: (1) ang: ex yāox tix pon laig līh ka pāox tix.(2)
tang: hak tiex ot, bawg yam prāix klawng: ang: ih pāox tix.(3)
rawm: nyāux ang: awm: pāox tix, been nab yam: yung: yi: mai:
kraung ceep eep sawm: tom: tang: khaing: pāox tix ceeix ceeix
heue.
Phan: māwh been, mug tix ih ngu, hu: tix ih ma: gha: tix ih
kaing:, kid tix taung: khix bīx tix yūh kaing awm: pāox tix uik
heue. Ang: ngai: lig ngai: lai ex dawg koe: awm: koe: cie pui
tang: ceu tang: cad, lox pa ah kuad ex kix dīx, yam gūah siyiiex
tix tawx ngai: lai ka pui ku ceu dīx, kix krai caw tix tiiem cie ex
Vax piang hak moi, Tax ex kix cai: rhawm: nieb tong: tix khliak
hak lai cie ex ah kix nin: heue. Ex kawn: Vax dah dha: ex khaix
pui, rīah kaing: māwh jao ang: ex koe: ngai: lig ngai: lai, ang: ex
koe: ping nyia cu: yi: ex tom: dah khaix pui jao ku plak ku vang
heue. In: māwh bāux ju ka dīx heue.
Jāh 1969 num hoek 1989 nun khix 4-17ng āix, māwh bāux
yam ju giex kuang: pati kum miu nit hak tiex man ka hak tiex ex
kawn: Vax. In: māwh bāux ju ra: heue.
1989 num khix 4-17 ngāix, tom: kuad ex Tax Nyi lai: mai:
Tax kuad ex Tax Log pang: kraix khrawm: kru naing can pa ot
daux hak tiex Vax. Kawn: rai peu sin:, mīex mai bun: doe hoek
khawm: pui mi pui hot, kiex thong: ex pluat tix tik ka been pa
vīex kum miu nit hak tiex man daux hak tiex ex Vax. Jāh num an:
ex kawn: Vax tang: yāox tix giex kaing: hak tiex cao: tix hoek
tom: in: singāix in: māwh bāux (3) heue.
18
Lox si diex kuad lai: mai: kuad Pang:
Sau: riang rao yūh cao: tix ih.
Nghox kīeh naog krao: khaox.
Gaox kīeh haoh krao: prim:.
Im: yum saux ngia māwh gaox sawm:.
Mhawm: nēx mhawm: nham: kaoh khaing: gaox.
Paw tang: lox paw si yox moing.
Pui ku ceu kīeh awm: mūah tix reu ceu tix mu:.
Paw gūah ceu pui paw cheu kaing cāox.
Krax moh krax rhawm: māwh riang rao.
LAWG 12
GRAWNG KHAOX RAIX KHAOX RUNG.
Khaox raix khaox rung, phan: kūah tix māwh khaox, ang:
tie awm: khaox tang: ceu, khaox tang: ceu phan: kūah, kūah
piang tiex uik heue. Khaox raix khaox rung koe: tom: nie
ceu, ang: ex uik tawng kaux chix si mawd ceu kix uik, grawng
kūah khaox raix khaox rung māwh yūh nin:, sim: lai: kiang ih
plix mai: aing: tix piang khaox tang: dah phan: ang: māwh nan:
19
ka piang rang: tom: līh kūah tan: heue.
Khaox raix khaox rung, yam jāuh kix tix kūah, kūah sinax
kak khaox tang: ceu mai: piang: rang:, yam jāuh rīah kix ang:
nyiang pon hoek ka piang tiex, kix kawn kab tix mai: khaox
tang: ceu, phan: hoek yam plix tang: deeih māwh plix raix plix
rung, phan: hoik ting pang: lang: kak kix tawb kheem: can
khaox pa kuah tix piang an:, khaix an:, can khaox an: kix yum
tang: heue.
Khaox ox nghox khawx tawng bawg tix.
Khix num bawg yam viang rheeng: kawx ang: tīeh ang: loh
ot been tix.
Khaox raix khaox rung cung piang pui.
Teei tix ting ving tix vīeh.
Yam jāuh ang: tie kūah piang tiex
Cao: priex cao: rien yum tang: kix.
Buan: son: pon kix, kix pi prah.
Pui tix blah yam jāuh, im: klawd mai: pui tang: kaux, ang:
tawng: buan: son: pa hoik pon tix yāox hoik naog tu, pu praok
tix nieb deeih pi cao: priex cao: eei: tix ang: tie ah lāoh lie ting
buan: son:, deeih gut kheem: cao: priex cao: eei: tix awm: deeih
kīeh khaox raix khaox rung khaox pa kūah tix ka piang yum, in:
ex caw tix priex rhawm: tix ka heue.
LAWG 13
KRAX LAW LI HAK TIEX VAX.
Hak tiex Vax māwh hak tiex haoh gawng lua klawng: ngawd,
rīeh rang: son sang hu: tang: nghox tang khix hu: laih, lai, hu:
krax lang: diang si ngai māwh tang: ex ka law brung mai: moi
khan: kix heue.
Māwh kheu: koe: krax nu kin: yūh nin: son sang doh krax
law li phai: hoek phai: hu: si nax nyiiex liep yaong: daux vawng
meung Vax tom: thong: ex paug krax law li, kīeh doh ku plak ku
20
vang heue.
Sivoe 1989 num
krax law li daux
hak tiex Vax, jāh
Pang: sang: hoek
Meung mau, hoek
Tāoh mie, kaung:
taw: Meung mau,
Ho pang, viang
māwh kawx nin:
can krax law li an: pau pon hu: ngie yam rung prāix khaing:
heue.
Krax law li in: kix, māwh Tax yiiex mīex keeing:, aik o:
pre nan ex can pa ot hak tiex vax khawm: uik, tang: vīex prāix
ih cao: tix, vīex baug si ngaong, vaig moe:, kīh ih taux rhong:
cao: tix mai: paug heue.
Jāh 1989 num Kuad Lai: Kuad Pang: son sang doh krax
law li ku dah ku dee kiex kīeh ex bāox sau: riang rao tix si toe
tix paug, yam in: ex hoik pon kaong: krax law li 3000 lhak,,
sivoe 89 num pau pon kaung: 300 lhak, khaing: heue. Krax ot
plak kraung ceep eep sawm: rawm: nyāux hoik tang si yox hu: si
nyek, jāh 1989 num hoek 1999 num, daux kao: (10)num, ex
hoik pon tom si maox (750) lhak heue.
Krax law li in: kix hoik kaoh khaing: rawm: lauh jauh
māux riang rao, mau khri: can kawn: pui pa ot daux hak tiex Vax
uik heue.
Paug krax law li, paw doh pi awx.
Ki kawx mie ding, paw prah krax.
Lai ling ing: tiang ang: lai nu.
Cu nghiet lox pāox yāox krax mhawm:
Krax lawng gawng hu: ang: lheu krax.
21
LAWG 14
GRAWNG YEX KĪH
Yex kīh nawh kēh daux yaong: man rai, ju Tax ju yax
līh ex dīx kawn: pui ang: nyiang yāox tix ih kīh prīex ih pui ceet
ciang: baik ngie yūh nan: hoek
daux bāux ju yex kīh, daux
yaong: kix lai: loh tix kuh eep
plok taux yam bīh tix, yam caw
tix hoek bawg cie yex kīh, taux
plok nawh jiet nyawm tix rheep
jao koe: kīh tix heue. Yam an:
pui nyiiex pui yaong: kied daox
am: ka, māwh kheu pa tix pa kīeh
nyawm lie? Pui ku kaux keed
daux rhawm: tix ra: lai: chawx
pāox tix hoek ngāix khaix kix
ah nin: ka yex kīh kied nyawm
yūh māix prīex māix ca: bāox
bre ex ih prīex singāix awx.Yam an: pui hun: ploi:
pui brīex hu: jawm hu: jiang tix
yāox yam yūh Yex kīh prīex, yam
an: kix yāox krang krāh Yex kīh
tix ka piang khang: plok tix taux, chix yūh kaing brai: nu: nai:
yūh nin: ah, mai: kix pheet Yex kīh to: heue. Yex kīh to:
khaing: man: rai hu: mox tix yaong: maw: noi mai: yum
tan:,hoek tom:yam in: dee yum nawh kīh lih ka heue. Pui tang:
ceu tawng tix kin rawm: daux rang: yum Yex kīh mai: plok
rhaung: māwh kīh, kix tawng kāoh Yex kīh khaing: hak tiex vax
yaong: man rai:, kix tom: phat tawx gha: kīh tix num tix bawg,
daux yaong kaung: yaong: ting: man rai khaix heue. Māwh kheu:
22
caong kuan man: rai kix tix kid kaing: pui pa hoek tix tawx gha:
kīh jauh yam an: pui ang: lai tawx gha: kīh khaix heue.
Kīh līh khaing: Vax
Tax yax ang: tawng.
Gawng ang: kīh koe:
Līh awm: pui aw:.
Ih kīh ding khaw, phaw: lox pie ngaing:
Daing: nyawm taux jao kīh
Taux ang: koe: kīh līh tix nai:.
Saux ang: pai: māwh grai: pui.
LAWG (1)
GAOX NGHOX
Gaox nghox māwh si niag nēx nham: son kawn: pui, gaox
nghox māwh pa ih ex kawn: pui ku ngāix ku sawm:, māwh pa
ceei: ex ju tix son sang im: ex piang hak tiex heue.
Ex kawn: pui phan: gaox nghox ang:koe: ang:
ex chix klawd tix māwh sim: im: tix māwh
pui heue. lheu: khaing: in: son kīh ih mau cai:
ex kawn: peeng nang: tix cōh māwh mau
cai: tai pak tix, exkawn: vax ang: ex hiex
tawng tix yūh laih lai awm: pui tang ceu, kraung ceep mau cai:
ex du ngie piang gaox nghox tix yieh son 90% son khaing: heue.
Māwh kheu: nin: gaox nghox māwh pa kied ting buan: son:,
son ex yūh nin: ex caw tix sau: riang sau: rao tix sum: van: gaox
nghox ku kaux . lheu: khaing: an: ex kawn peeng lig ia: law
brung ih moik, ih kam: nghox, ka: sivoe in: dīx, ex shiao: krak
moi teem: tix yūh kaing jhaw:, ang: tawng tix chix shiao
ngau(phon:) sau: kawx riang tix mie ding kawx, ca: māwh ngie
uik riang nai: kaing ang: yāox tix pon to:dee keung: ex tix pon
heue. can kawn: pui ot piang gawng piang lua pa ang: koe: ping
nyia cu: yi: pau dēuh rhawm: tix ka bāux yam prāix klawng:, jao
in: si ngaung kaing saing:nghox pa yūh ex, ex sum: nai: grai:
riang ka:tix mie nyao heue.
Ih riang jung pui mai: krak, krax haok krax huan:, ang: koe:
heue.
Ex kawn: pui pa ot piang gawng piang lua, phan: ex van:
kawn: nghox dee yawm phan: ang: koe: tix khix plak, tom: hoek
ra: khix ang: chix tix sum: heue. phan: kawn: nghox ang: hoek
khix sigāix tix, nghox pa sum: ex an: ang: sok tang: heue. yam
an: phan: sum: simie nghox (1) glawm: pau pon nghox (15)
glawm: tom: hoek (20) glawm:, yam in: pui pa koe: ping nyia cu:
2
yi:shiao cag thai:, mai: tawng tix chix shiao ngau phon: ku ceu
ku cawng, nghox pon pui kied daing: nie haok nie huan: jao
tawng pui tix sau: ngau phon: ku ceu ku cawng, mhawm:
gawng:, mhawm: plix mai: mhawm: lhax heue.
Phan: uik simie (1) glawm: pui pon to: (100)glawm: heue.
Māwh kheu: nin: son ang: riang rao ex nai: nawk, ex caw tix
hawt daux krax pa thong: bong: pa jhi: cub caw plak sum: van:
son ngaox heue.
Gaox nghox doh yūh krax
Brax kua: kaoh khaing: gaox
Gaox ang: koe: awm: kawn: doe.
Koe: gaox sawm: awm: simiang.
Paw tik paw prah sum: nghox khawx.
Tawx dee mawx pui awx dee an:.
LAWG (2)
GRAWNG EEI: IA:
Ia: māwh to: sat pa eei: kawn:
pui ka tix ceu. ia: jiet chix tawng
bawg yam awm: ex kawn: pui,
yam ang: nari nyiang koe: dīx,
kawn: pui krox tix mhong: yam
ux ia:, voe bīh riang prāix, ia: ux
3-4 bawg, khaix an: prāix tom:
tag riang heue.
Ia: tix ngāix ux (4)bawg, ia:
peeng ex kix māwh cao: so: tix
kaoh, ex peeng tix ih nēx, ih
tom: kix, phan: māwh ia: koe:
ra: ceu, tix ceu māwh pa chix num tom: cao: tix, ra: ceu māwh ia:
3
tom: bhaung: heue. ia: kied koe: buan: son, son pui saux ngia,
pui saux, pui pa ang: kub nēx nham: phan: yāox tix cao ih nēx ia:
tom: ia: kix phai: deeih nēx nham:, phai: kluing, phai: koe: riang
rao, kheu yāox tix ih nēx ia: heue.
Ia: ang: deuk ngie ih nēx kawn peeng tix cōh cao: ia: mai:
tom: kix, ex kawn: pui, kawn yūh taoh yūh sawm: shiang:,
sawm: mau ka tix blah heue. phan: ex sang yūh krax lu krax tan,
ex jāh tix shiao ia: si voe. ia: māwh nēx pa yie tix rhaoh son ex
kawn: pui heue.
Sau: riang eei: ia:, saux yha: māwh ia:.
Kia: saux, taux lhaux plaux ka ia:
Hoek nyo, po: sim:, to: liag ia:
Jhawm: nyawm rawm: ia: lheu: khaing: sia:
Kia: saux, kia: yha: vīex phak ia:.
Hot cha: eei: ih ia: dia yūh ot.
LAWG 3.
SIMIANG PA MHAWM: RHAWM:
Dīx dīx koe: simiang ting tix
kaux ang: sa: gut sa: kheem:,
yax yeen, map nai: tix ih kawn:
rai peu sin: tix heue. si diex
pui yūh tix ih kaing jhaw:,
yūh tix kub sawm: nyawm ot
ku kaux daux pui paw tang:
lox six yox moing, khaing:
pāox tix, bre tix yūh sa: tixka pa ih nai: cai:
haoh, si: diex gau pui yūh nin: heue.
An: tix ngāix nawh yūh tix awm: peu sin: mai: laig laih, son
sang tawng grawng kraung ceep eep sawm: pui daux hak tiex
giex kuang: tix heue. Simiang an: ceep kraung pa cāox pa hoik
4
griah, mai: chawk tix liag man: luat man: pre pa kied ting ngāwh
ting jum, pui cao: cōh kraung an: yāox kraung ceep nawh mai:ah
nin: ka simiang an: “hu: hu:”maung māix pui yūh nin: ang: doh
dud tix pon liag ceu kraung ting ngāwh ting jum yūh nin: ah nan:
ka simiang an:, mai: grheu simiang an: to: heue.
Tax simaing an: ang: nye: ang: nyux, nawh nyīah khawm: ah tix
nin: “mhawm: mhawm: aux lawk ing: heue.
Nawh hoek ka tang: kaux pa cōh nang: kraung ngāwh, kraung
pa ting jum awm: pui an: phao:voe nux heue, pui an: ah nin: ceu
kraung in: phan: ang: māwh ceu laux simiang mai: pui pa mag
mi khri: mau, ang: pon liag, kheu caw kraung pa ting ngāwh ting
Jum, māwh kheu: nin: māix hu: tang: dah sawg māix liag pa yie
ngāwh ceeix awx.
Tax simiang an: pawk lox cao: cōh kraung an: ah nin: lāoh lie
ting buan: son: ka lox krai māix ka aux, aux ing: ha: awx.
Si nax ra: loe: ngāix si: miang an: kok simiang ot greem: tix
krai lao kix mhong: pa hoik yāox tix, mai: sidiex ka kix awm: in:
plak greem:.
Rawm: loh diang simiang thai: cao:.
Paw nīeh ka pui hot, paw cot ka pui saux.
Paw nyiah ka mi, paw khi ka hot.
Paw nīeh ka kawn: doe:, paw rhoe: ka pui loeg.
Rāuh te pui tom: krox puing: klang:, lang: rhawm:.
Pui tom: mhawm: prawng prāix.
Pui ting tu, pu rhawm: ang: lang ju.
Lox in: een: ka niex praix daux rhawm: pex ku kaux awx.
5
LAWG 4
RĒEH TAWNG BUAN: SON:
Dīx dīx koe: lien: tix kaux yam
hu: laig laih, nawh yāox cao:
cōh kawn: rēeh tix mu: mai:
liag kawn: rēeh an: heue.
Yam hoek lien: an: daux nyiiex
tix, nawh sau:kawn: rēeh daux
ngoi, kawn: rēeh an: ting tix ngāix
khaing: tix ngāix, lien: an: kied
daox deng: ka, pie daux alīah
singāix, ting huan: sidu pon ba: ex kawn: pui heue. Lien: an:
jhak ka rēeh, nawh kied cee rhawm: ka yāox tix mai: hu: ploi:
rēeh an: daux klawng: ting heue.
Viang nawh kied moh kawx rēeh an:, dee sidāh nawh ploi:
ka rēeh heue.
Ang: lai awt rheung glang: mawx tix naing tāoh daux hak tiex
ot lien: an: pui hak tiex an: khawm: uik to: son sang lawd luan:
khaing: krax yum, si voe pui to: khan: kix koe: rawm: klawng:
ting tix klawng:, son sang ang: kix man: pui cāox kuan kix daux
diang klawng:, yam an: pui to: pui tua khan: kix taing tix laig
daux rawm: pui plak nie yum daux rawm: an: heue. Ka daux pui
an: kix lien: pa ploi: rēeh liag tix, ka vīex ka daux kix, yam
nawh cod daux rawm: nawh mhong: tum: caong tix piang rang:
daux rawm:, nawh bre tix jhak, yāox cung tix piang rēeh paing
tix mu: heue. Rēeh paing an: vīex nawh tiang klawng: plak an:,
dee ang: pui koeng lai pon hoek, lien: an: yaog tix līh piang tiex,
rēeh yaog kaing: tix loi loi mai: deeih gi tix jhak ka lien: an:
heue.
Khaix an: rēeh koi deeih laig daux rawm: nawh ca: gi pot tix
jhak ka lien: an: heue.
6
Ex pa māwh kawn: pui ja lao ex ang: yūh tix tawng buan: son:
pa yūh pāox tix, pie rēeh pa māwh to: sat chix tawng tix pawk
buan: son:, phan: pui yūh kaing pa mhawm: piang ex, priex
daux rhawm: khrawm: mai: kaux tix awx. Pui pa tawng buan:
son: ang: doh yāox krax lāux.Gāux rhawm: yūh kaing mhawm:,
tawm: lox ih rhawm: rāuh rhawm: see, eei: ka kaux, saux ang:
yāox.Pui ting ngawg, kawk rhawm: ang: lang: ju.
LAWG 5
GRAWNG SI NGĀIX.
Singāix māwh ceu pa ang: koe: mu: koe: lon: awm: koe: cie hak
tiex, singāix māwh ceu pa hax pa koek awm: ngu, singāix mai:
hak tiex singai khaing: pāox tix dim: lan ra: lag dim sien: lhak
heue.
Ex kawn: pui keud singāix iak khaing: hak tiex, viang māwh
nan: singāix kawn lheu: ting khaing: haktiex heue.
Singāix māwh pa koe: buan: son: ka piang hak tiex, can pa im:
ju piang hak tiex māwh kheu jao pa riang singāix si u: singāix
tom: yāox tix im: ju heue.
Māwh kheu: jao pa hak pa koek singāix rawm: tom: līh tix
māwh bhawm: māwh meet, tom: tīeh tix māwh pai: awm: piang
rao ma: khaix an: yam si pub ka bhaung: leet, bhaung: si kied
7
tom: lih tix māwh lhiex, māwh kheu: pa hax pa koek singāix tai
khan: kix mhawm: lawm: jhawm: griang chix līh tix koe: heue.
Plix khaox, plix ox, nghox khawx, chix ting chix teem māwh jao
singāix, lheu: khaing: an: kheu: pa riang singāix ex kawn: pui
yāox krax nyawm ot siu: koe: brax kua: ting huan: heue.
Sngāix jhan: riang piang hak tiex.
Nyiiex yaong: hun: prīex kun: hak tiex.
Priex khrawm: mhawm: yāox jao singāix.
Singāix jhan: riang. Lheu: khaing: shiang:.
Simiang piang tiex māwh singāix.
Singāix tix diang liang leeing ju.
Tai lawm: mhawm: pruh jao singāix
LAWG 6
KĪH
Kīh māwh pa sidaing:koe:
buan:son:, son ex kawn: pui mai: to: sat
ku ceu ku cawng te te, viang māwh
nēx māwh puan: taux lhax phan: ex ang:
sau: kīh ka daux, viang māwh pa ah ex
nēx puan:, ceet ciang mai: baik ngie
heue. Kīh ang: jhoeng: māwh ngie
nyawm yūh taux lhax puan: nēx,
prīex preem nong: nong:, kawn baox kīeh nang: ex kawn: pui
mhawm: nēx nham: singax singēh kaux hak, joh jhaung: krax
brax kua: ex kawn: pui heue.
Pui pa yūh kaing nu, pui pa mawn riang rao tix, kheu:
sidaing: līh lauh kix caw tix lheu: ih kīh khaing: pui tang: kaux,
viang māwh kawx nin: phan: ih luan: khaing: diag tix ex chix
pon jhawm: saux haok nham: ka heue.
Nēx ku ceu son sang ang: cūx sium: mai: rheung: tix een:, phan:
8
ex ang: sau: kīh ang: chix, phan: saux ghok, saux rhang: phak ka
rawm: kīh chix moi: chix nghie: ka, kīh māwh ceu pa pēx ceu pa
cūx pa sium: heue.
Ang: jhoeng: māwh ex kawn: pui pa moh tix ih kīh nong: nong:
pie to: tiag to: tu, khawng: ceei: brie liang ex, kix ka miag ka kīh,
phan: māwh dee kāoh kīh tix blah pui teei khaing: daux gawng:,
tix blah, dee khien: dee lāoh rawm: pang: lai: pui ka teei kīh kah
heue.
Sium: yum rham:, nēx nham: yawm.
Ih kīh chix līh koe: riang rao.
Krāwx rham:, kham: geu ceu saux rhang:
Lung lang: rawm: kīh chix moi: yūh.
Nēx nyawm kheu kīh khix lah jao ngu.
Nēx ang: koe: kīh māwh taux
Saux ang: pai: māwh yum.
LAWG 7
PAW IAK NGAI: GAIG PIANG PĀOX TIX
Dīx dīx koe: kang koi tix mu: hu: lai ling tix sawg pa ih pa
un:, kang koi an: jiet si pub rēeh tix mu: koi hu: loi loi, kang koi
ah nin:, mīex maung hu: māix in: māix tom: doh yāox hoek ka
dee sang hu: tix yam mawx in: lie?
Rēeh pawk lox kang koi mai: ah nin:, “HE” māix paw iak
9
gaig ka piang pui awx, sang kīeh māix ax lah tix to: hoek ka
piang gawng tieh lie? “ HA: HA:” maung māix pa ang: pon hu:
yūh nin:, nieb pon hak aux si lah to: chix –ceu māix pa ang: tie
dud tix pon hu: phai: awm: pāox yaong: tix, hak ax si lah to: ax
jāh phao: awx, 1,2,3, to:, kang koi ka daux tix vud hoik singai
luan: khaing: rēeh tix miex nyao, kang koi keed ah nin: daux
rhawm: tix ang: rēeh pheem: in: doh tau tix krup ka aux, aux
laux tix tin: mai: it tix vud ha, rēeh hu: cie tix loi loi, ang: lai
laux lee tix, nawh tom: pon tix hoek si voe kang koi piang
gawng heue.
Khaix hoik sak it kang koi, nawh siduat mai: kaoh yaog tix
to:, haok piang gawng, yam hoek kang koi piang gawng yāox
hoik ot rēeh sivoe tix, kang koi sidaing: kaig ka rēeh te te heue.
Kang koi keed daux rhawm: tix ah nin:, aux ce: tix māwh
pa lāoh pa lie, pa lhak pa lhiao: khaing: pāox tix, kox man: tix
iak ngai: gaig piang pui tang: kaux, ang: tie awm: pa keud pa ce:
aux, in: kied māwh krax kaig tua son aux te te heue. Kang koi
tawm: lox ah nin: pāox grawm pux aik kawn: keeing: pa moh
aux khan: kix, ting ang: ah iak ang: ah, phai: ang: ah, nhim: ang:
ah, paw vi iak gaig ka pāox ex awm: aux liak awx. Aux ang: lai
keud lai sawn: rhawm: tix nieb ce: tix lāoh khaing: pui, jao in:
aux pon krax kaig ngai: ka heue.
Paw keud tix lāoh khaing: pāox tix.
Cāox griang mhawm: riang ang: pon tiang.
Kang koi viang phai: grai: kaux ka hoi.
Toi: klawng: gawng pui ang: tie tawng.
Hoi: koi lawng krax, brax hu: khaing: nawh.
Viang māix phai: caong phan: ang: sau: riang.
Diang hu: māix lud, dee cud māix māwh an:.
10
LAWG 8
GRAWNG KHIX KHRAOX.
Ex kawn: pui yam jāuh khix
tix haok keud māwh jāuh tix
haok plak klip si ngāix, viang
māwh nan: ang: tie māwh awm:
pa keud pui tix heue.
Māwh kheu: caw khix tix
hu:plak pon ngāix piang ex,
kheu: jhan: riang singāix ex
tom: ang: chix yāox khix,
tom: singāix hoik laig, ex tom:
tag yāox khix, yam an: haok
khix tix som: tom: ah ka heue.
Yam an: nawh deeih vid
si vawg tix plak līh singāix,
jee khix deeih khix tix som:
nawh deeih vid si vawg plak klip singāix hoek tom: yeet tix
heue.
Haok khix 15 som: ex ah pang: khix ka yam an: khix jiet
lawm: le awm: bia: keem gaox heue. Phan: hoek 30 som: ex
plak līh singāix ang: lai chix yāox khix, yam an: ex ah yeet khix
ka heue. Yam an: khix tom: caw tix pang: ka meung pa ot plak
klip singāix, yam yeet khix ka plak klip singāix, caw tix pang:
ka ex plak līh singāix heue.
Yam caw khix tix laig sinax haktiex kiex singāix boe hak
tiex caw tix thawng: daux khix yam yūh nan: khix jāh tix faik
kawn: pui tom: ah pom praog khix ka heue.
Kheu: koe: khix ex kawn: pui tom: tawng tix sawn: singāix,
khix, num, tix num koe: 12 khix phan: ang: māwh nan: koe: 365
singāix heue.
11
Khix pa riang simiang pa mhawm:.
Khrawm: ex klieh vung viang: pang: khix
Riang khix khraox jhaox khrawm: tix graoh.
Khraox kāoh kix, khaing: bīx tix ma:.
Haok nyiiex paox maox vien khix.
Khix mhawm: paing daux sawm: kao: phuan:.
Khrawm: ex pāox tix daux nyiiex pex.
Yiiex kuad sinaw ah lox leng.
LAWG 9
PUI KID KHAOX RĀUH SEE.
Ka daux tix singāix cao: kid khaox tix kaux kid khaox
praok klawng: ting, yam kid nawh khaox nawh man: moe: tix
kreuek daux rawm: heue. Cao: kid khaox an: son sang deeih
yāox nawh moe: tix cu: ca: tix sawg daux rawm: yūh ka mawx
kawx ang: yāox moe: heue. Dee nghoik cao: kid khaox an: dah
rhawm: mai: tu kap tix ngawm praok klawng: dee kreuek moe:
tix mai: ah tix nin: hoik aux tix ih phao:.
12
Cao: kid khaox an: yiem yo jao grai: moe: kid tix khaox,
yam an: phi: cao: pau ka klawng:, mhong: lox yiem cao: kid
khaox an: mai: phi: an: hoek ka nawh, chawk nawh ah nin: pui
kid khaox, yiem māix mai: dah rhawm: māix kheu: pa tix lie?
Kreuek moe: aux daux rawm: aux tom: yiem jao, nawh pawk
lox phi: an: ah nin: heue. Yam an: Phi: pau rawm: teei moe:
khri: jhi: pui kid khaox an: yāox, māwh in: moe: māix lie?
Nawh pawk lox ka phi:an: ah nin: ang: māwh moe: aux pa
kreuek daux rawm:,moe: aux māwh moe: rhiem: phi: an: bāox
deeih jhi: nawh yāox moe: mau, pui kid khaox bāox pawk lox ah,
ang: māwh moe: cie tix, dee nghoik phi: an: bāox deeih jhi:
nawh yāox moe: rhiem: pui kid khaox an: gāux rhawm: khawm:
pawk tix lox phi: an: mai: ah nin: lāoh lie ting buan: son:, in:
māwh moe: pa grai: aux heue.
Phi: cao: pa pau ngom rawm: an:,khaw rhawm: ka lox
pawk pui kid khaox kheu: māwh lox rāuh lox see, nawh tawx
moe: khri: moe: mau hoek khawm: moe: cao: kid khaox an: ka
nawh khawm: loe: mag heue.
Pui kid khaox an:, nawh krai pui mhong: grawng in: daux
yaong: uik heue.
Yam an: koe: pui daux yaong: kix tix kaux mhong: grawng:
an:, nawh yūh tix hu: kid nang: khaox praok klawng: an:, nawh
yūh tix lu lied man: moe: tix daux rawm: mai: yūh tix yiem grai,
riag yo, yam an: phi: pau klawng: hoek mai: chawk ah nin:, riag
yo māix jao pa tix lie? Pui an: pawk lox ah nin: kreuek moe: aux
daux rawm: yam kid aux khaox in: nūx heue.
Yam an: phi: sut moe: khri: daux rawm: mai: chawk pui an:
ah nin: māwh in: moe: māix lie? Pui an: pawk lox dom mawx
dom an: “māwh māwh” ah lox pie lhen: yūh nin: ka phi: pau
rawm: an:, yam an: phi: tawng māwh lox pie lhen: lox ang: rāuh
see phi: an: giex moe: khri: mai: grai: tan:, pui an: jalao pon moe:
13
khri: moe: mau, pie moe: cao: nawh ang: lai yāox, kheu: kawk
vawk, ang: rāuh rhawm: rāuh rhi: heue.
Pui ting ngawg vawk rhawm: ang: mhawm: ot
Pa rāuh pa see, dee hu: ang: die.
Simie ceu tix, chix pon uik.
Pui tīeh lu: lieh dieh yūh ot.
Pie lhen: ka pāox yāox krax kaig.
LAWG 10
SIMIANG PRAWNG RĀUH SEE
MAI: KAWN: NYAWMPA KOE: CU:YI: TIX KAUX.
Dīx dīx koe: Tax cao mi tix kaux mai: Tax kuad hot tix
kaux mai: kawn: nyawm gau lai pa koe: cu:yi: tix kaux.
14
Tax cao mi an: mai: Tax kuad hot an: caw tix dēx nyiiex tau
Tax kuad an: koe: brung mīex tix mu: mai: caw tix nghe: awm:
nang: an: Tax cao mi ka koe: nang: moi mīex pa caw tix nghe:
tix mu: heue. Daux bawg yam som: tix mu: brung mīex Tax
kuad an: mai: moi mīex cao mi brieb tix kēh yam tau heue. Tax
kuad an: ang: laig it leeing: som: simie prāix nied tix riang kheu:
simie tix yāox ngai:kawn: brung tix heue.
Tax kuad an: kaoh cao cao līh jhak kawn: brung kēh cie tix,
yam an: nawx kied daox deng: ka yāox tix it kawn: biex mai:
brung mīex cie tix, te te māwh pot Tax cao mi an: pa mox tix
brīex kawn: brung mai: hu: dēuh mai: moi mīex cie cao: tix, teei
kawn: moi biex cie tix hu: dēuh mai: brung mīex cie Tax kuad
hot an: heue.
Tax kuad an: sawg kawn: brung cie tix yāox ot daux
kawg cao mi mai: moi mīex kix, Tax kuad chawk Tax cao mi an:
ah nin: yūh ka mawx māix nieb brīex kawn: brung cie aux dēuh
mai: moi mīex māix lie? Tax cao mi an: nyīah mai: pawk tix lox
Tax kuad an: khawm: ah tix nin: hoik māwh son: brah son: yawk
māix, ang: brung saux kēh moi ang: moi saux kēh brung, in:
hoik māwh mhawm: son: aux cao mi, moi mīex aux tom: kēh
kawn: brung ang: māwh lie?
Yam an: Tax kuad hot hak kiex hu: kao: ka simiang ting,
Tax cao mi an: brīex tawx mau cun: praok ka simiang an: heue.
Simiang an: prawng yūh ka mawx kawx ang: plak pui
mawx tix tie cu tix gōh grawng: an:, simiang an: ang: lai tawng
ka pa sang yūh tix, tat lox ah nin: ang: pax tie cu tix nghiet lox
aux, haok khix dim: dim: som: pon ngawb dim: taix pax deeih
vīex pāox tix hoek tin: dee ot aux, nawh tawm: lox ka kiex ah
nin: heue.
Tax kuad an: kied dah rhawm: voi rhawm: khawm: ing: tix
ka nyiiex, yam an: Tax kuad sipub kawn: nyawm gau lai tix
15
kaux, kawn: nyawm an: yāox ing: Tax kuad khawm: dah rhawm:
tix nawh chawk ah nin: Tax, awm: pa ang: māix hiex nyawm
rhawm: nix lie?
Tax kuad an: pawk lox ah nin: “māwh heue”daux som: tix
mu: brung mīex aux kēh, moi mīex cao mi dēx nyiiex aux ka
kēh, cao mi an: brīex yaog kawn: moi cie tix hu: een: mai: mīex
brung cie aux, nawh teei kawn: moi cie tix, een: mai: brung
mīex cie aux yiex tom: kao: ka simiang, ang: nyiang cu tix dud
ah lox tix, simiang deeih mhaing: yiex hoek khix dim: dim: som:
mai: dim: taix heue. Aux tau rien tix som jao ang: aux yāox tix
tawx mau cun: praok ka simiang an:heue.
Yam mhong: kawn: nyawm grawng an: nawh ah nin: ka
Tax kuad an: “Tax” paw awt yūh māix khi:, son in: ang: cāox,
phan: hoek ngāix an: sax, yūh māix lha: hoek khaix Tax cao mi
an: phan: simiang chawk māix ah nin:, yūh ka mawx māix nieb
lha: hoek yūh nin: lie? Māix tom: deeih pawk lox nawh ah nin:
“ māwh heue” Tax simiang, yam hu: aux, aux hoek daux diang
klawng: aux yāox hax mhaik, aux tom: kin rawm: ka yau, mai:
yūh lung preet tix ngu ka, ngu tom: taug yeet aux lha: hoek jao
heue. Yam an: simiang teu ah nin: ka māix yhot māix ang: mawh
lie? Piang hak tiex ang: aux sax mhong: hax mhaik mai: kin
rawm: daux yau, “māwh heue awm: pa ah tax simiang tix”
piang hak tiex yie sax mhong: ex nang: kēh brung mīex kawn:
moi lie? Moi mīex kēh kawn: brung lie?
Yam an: Tax simiang an: ang: lai tawng ka lox sang pawk
tix, simiang keed rhawm: tix ka lox krai Tax kuad, māwh lox
rāuh see simiang an: sux ka cao mi an: mai grheu: nawh ing:
heue.
Ex kawn: pui kaing ceu pa tix ang: ah, phan: māwh ceu
pa māwh ah māwh, phan: mawh ceu pa ang: māwh ah ang:
māwh awx. Paw kham: mhai: sag se pa ang: māwh ang: mēh
16
son pāox tix liak. Kawn: nyawm in: phan: ang: gau lai nawh ka
ang: doh tawng tix gau Tax kuad an: yūh nin: heue. Paw nīeh
paw cien sau: riang rao tix gau lai yam koe: bawg yam son ex
awx.
Phan: koe: cu:yi: ang: doh khi:
Fi: fang: dee mawx nawh kawx cu.
Ngu cu tu daw caw daux krax.
Paw khin: tix yūh tuih yūh krax ot.
LAWG 11
MEU BĀUX JU HAK TIEX VAX.
Meu bāux ju hak tiex Vax koe: (3) bāux ex kawn: Vax jāh
tom: si ngien rang: sigang: līh kaw: tiex tix loi: kaw: moi tix
bāwh kaw: raix tix pang: kaw: rang: tix peem: ex hoik dawg
māwh ceu pui pa koe: piang hak tiex nang: heue. Ex ka hoik ao:
min: ting ceu piang hak tiex, ex ang: saux sawg tix cax hak tiex
nyiiex yaong: ot pui tang: ceu tang: cad ex tang: dawg yūh tix ih
ma: tang: tix yūh kaung: pawng rawng nie, lox pa ah tax yiex
mīex keeing: ex ka in: hoik ot nang: daux tong daux ce dīx,
māwh kheu: lāux ex ka naing, ex tom: phru phrat tix ot ka
gawng piang lua, tang: ot tang: koe: khaing: pāox tix, bawg yam
an: māwh moeg, māwh kuad lang: simiang ting, kuad kie: krawx.
kuad eeng, sipug ru, pagiex kuang: piang ex, kawn koe: cao mi
ting tu pu rhom: pui tang: yaog tix ting ving tix vīeh, grhang:
hak tiex ka pāox tix, puing: naing graing cāox ex kawn: rai peu
sin: ang: yāox tix nyawm ot singēh koe: jao heue.
Kawn: pui hak tiex kha: rhom: son kraung ceep eep sawm:
rawm: nyāux kīh ih mau cai tix te te heue.
Sivoe 1969 num hoik koe: mie rheng: mie mheen: ju
mawx nieh, ang: ex lai uik simin, ex kawn: Vax tang: ot si yut
koe:, ang: pon laig līh lai ling ing: tiang dee ot pāox tix jao
17
puing: puah kuad prim: ka pāox tix ang: jud ang: jai heue.
Yam an: pui tang: ot tang: koe: kaung: mawx kaung: an:,
eeng mawx eeng an: ang: doh pon hoek dee ot pāox tix pui hoik
tang: tat tix dēuh meu hak tiex sinax pāox tix, ang: pon tix cax
prāix sawm: klawng: nyāux hak tiex brīex brum pāox tix tang:
lox sikah ex kawn: Vax khaing: pāox tix, tix ceeix, grawng
māwh yūh nin: (1) ang: ex yāox tix pon laig līh ka pāox tix.(2)
tang: hak tiex ot, bawg yam prāix klawng: ang: ih pāox tix.(3)
rawm: nyāux ang: awm: pāox tix, been nab yam: yung: yi: mai:
kraung ceep eep sawm: tom: tang: khaing: pāox tix ceeix ceeix
heue.
Phan: māwh been, mug tix ih ngu, hu: tix ih ma: gha: tix ih
kaing:, kid tix taung: khix bīx tix yūh kaing awm: pāox tix uik
heue. Ang: ngai: lig ngai: lai ex dawg koe: awm: koe: cie pui
tang: ceu tang: cad, lox pa ah kuad ex kix dīx, yam gūah siyiiex
tix tawx ngai: lai ka pui ku ceu dīx, kix krai caw tix tiiem cie ex
Vax piang hak moi, Tax ex kix cai: rhawm: nieb tong: tix khliak
hak lai cie ex ah kix nin: heue. Ex kawn: Vax dah dha: ex khaix
pui, rīah kaing: māwh jao ang: ex koe: ngai: lig ngai: lai, ang: ex
koe: ping nyia cu: yi: ex tom: dah khaix pui jao ku plak ku vang
heue. In: māwh bāux ju ka dīx heue.
Jāh 1969 num hoek 1989 nun khix 4-17ng āix, māwh bāux
yam ju giex kuang: pati kum miu nit hak tiex man ka hak tiex ex
kawn: Vax. In: māwh bāux ju ra: heue.
1989 num khix 4-17 ngāix, tom: kuad ex Tax Nyi lai: mai:
Tax kuad ex Tax Log pang: kraix khrawm: kru naing can pa ot
daux hak tiex Vax. Kawn: rai peu sin:, mīex mai bun: doe hoek
khawm: pui mi pui hot, kiex thong: ex pluat tix tik ka been pa
vīex kum miu nit hak tiex man daux hak tiex ex Vax. Jāh num an:
ex kawn: Vax tang: yāox tix giex kaing: hak tiex cao: tix hoek
tom: in: singāix in: māwh bāux (3) heue.
18
Lox si diex kuad lai: mai: kuad Pang:
Sau: riang rao yūh cao: tix ih.
Nghox kīeh naog krao: khaox.
Gaox kīeh haoh krao: prim:.
Im: yum saux ngia māwh gaox sawm:.
Mhawm: nēx mhawm: nham: kaoh khaing: gaox.
Paw tang: lox paw si yox moing.
Pui ku ceu kīeh awm: mūah tix reu ceu tix mu:.
Paw gūah ceu pui paw cheu kaing cāox.
Krax moh krax rhawm: māwh riang rao.
LAWG 12
GRAWNG KHAOX RAIX KHAOX RUNG.
Khaox raix khaox rung, phan: kūah tix māwh khaox, ang:
tie awm: khaox tang: ceu, khaox tang: ceu phan: kūah, kūah
piang tiex uik heue. Khaox raix khaox rung koe: tom: nie
ceu, ang: ex uik tawng kaux chix si mawd ceu kix uik, grawng
kūah khaox raix khaox rung māwh yūh nin:, sim: lai: kiang ih
plix mai: aing: tix piang khaox tang: dah phan: ang: māwh nan:
19
ka piang rang: tom: līh kūah tan: heue.
Khaox raix khaox rung, yam jāuh kix tix kūah, kūah sinax
kak khaox tang: ceu mai: piang: rang:, yam jāuh rīah kix ang:
nyiang pon hoek ka piang tiex, kix kawn kab tix mai: khaox
tang: ceu, phan: hoek yam plix tang: deeih māwh plix raix plix
rung, phan: hoik ting pang: lang: kak kix tawb kheem: can
khaox pa kuah tix piang an:, khaix an:, can khaox an: kix yum
tang: heue.
Khaox ox nghox khawx tawng bawg tix.
Khix num bawg yam viang rheeng: kawx ang: tīeh ang: loh
ot been tix.
Khaox raix khaox rung cung piang pui.
Teei tix ting ving tix vīeh.
Yam jāuh ang: tie kūah piang tiex
Cao: priex cao: rien yum tang: kix.
Buan: son: pon kix, kix pi prah.
Pui tix blah yam jāuh, im: klawd mai: pui tang: kaux, ang:
tawng: buan: son: pa hoik pon tix yāox hoik naog tu, pu praok
tix nieb deeih pi cao: priex cao: eei: tix ang: tie ah lāoh lie ting
buan: son:, deeih gut kheem: cao: priex cao: eei: tix awm: deeih
kīeh khaox raix khaox rung khaox pa kūah tix ka piang yum, in:
ex caw tix priex rhawm: tix ka heue.
LAWG 13
KRAX LAW LI HAK TIEX VAX.
Hak tiex Vax māwh hak tiex haoh gawng lua klawng: ngawd,
rīeh rang: son sang hu: tang: nghox tang khix hu: laih, lai, hu:
krax lang: diang si ngai māwh tang: ex ka law brung mai: moi
khan: kix heue.
Māwh kheu: koe: krax nu kin: yūh nin: son sang doh krax
law li phai: hoek phai: hu: si nax nyiiex liep yaong: daux vawng
meung Vax tom: thong: ex paug krax law li, kīeh doh ku plak ku
20
vang heue.
Sivoe 1989 num
krax law li daux
hak tiex Vax, jāh
Pang: sang: hoek
Meung mau, hoek
Tāoh mie, kaung:
taw: Meung mau,
Ho pang, viang
māwh kawx nin:
can krax law li an: pau pon hu: ngie yam rung prāix khaing:
heue.
Krax law li in: kix, māwh Tax yiiex mīex keeing:, aik o:
pre nan ex can pa ot hak tiex vax khawm: uik, tang: vīex prāix
ih cao: tix, vīex baug si ngaong, vaig moe:, kīh ih taux rhong:
cao: tix mai: paug heue.
Jāh 1989 num Kuad Lai: Kuad Pang: son sang doh krax
law li ku dah ku dee kiex kīeh ex bāox sau: riang rao tix si toe
tix paug, yam in: ex hoik pon kaong: krax law li 3000 lhak,,
sivoe 89 num pau pon kaung: 300 lhak, khaing: heue. Krax ot
plak kraung ceep eep sawm: rawm: nyāux hoik tang si yox hu: si
nyek, jāh 1989 num hoek 1999 num, daux kao: (10)num, ex
hoik pon tom si maox (750) lhak heue.
Krax law li in: kix hoik kaoh khaing: rawm: lauh jauh
māux riang rao, mau khri: can kawn: pui pa ot daux hak tiex Vax
uik heue.
Paug krax law li, paw doh pi awx.
Ki kawx mie ding, paw prah krax.
Lai ling ing: tiang ang: lai nu.
Cu nghiet lox pāox yāox krax mhawm:
Krax lawng gawng hu: ang: lheu krax.
21
LAWG 14
GRAWNG YEX KĪH
Yex kīh nawh kēh daux yaong: man rai, ju Tax ju yax
līh ex dīx kawn: pui ang: nyiang yāox tix ih kīh prīex ih pui ceet
ciang: baik ngie yūh nan: hoek
daux bāux ju yex kīh, daux
yaong: kix lai: loh tix kuh eep
plok taux yam bīh tix, yam caw
tix hoek bawg cie yex kīh, taux
plok nawh jiet nyawm tix rheep
jao koe: kīh tix heue. Yam an:
pui nyiiex pui yaong: kied daox
am: ka, māwh kheu pa tix pa kīeh
nyawm lie? Pui ku kaux keed
daux rhawm: tix ra: lai: chawx
pāox tix hoek ngāix khaix kix
ah nin: ka yex kīh kied nyawm
yūh māix prīex māix ca: bāox
bre ex ih prīex singāix awx.Yam an: pui hun: ploi:
pui brīex hu: jawm hu: jiang tix
yāox yam yūh Yex kīh prīex, yam
an: kix yāox krang krāh Yex kīh
tix ka piang khang: plok tix taux, chix yūh kaing brai: nu: nai:
yūh nin: ah, mai: kix pheet Yex kīh to: heue. Yex kīh to:
khaing: man: rai hu: mox tix yaong: maw: noi mai: yum
tan:,hoek tom:yam in: dee yum nawh kīh lih ka heue. Pui tang:
ceu tawng tix kin rawm: daux rang: yum Yex kīh mai: plok
rhaung: māwh kīh, kix tawng kāoh Yex kīh khaing: hak tiex vax
yaong: man rai:, kix tom: phat tawx gha: kīh tix num tix bawg,
daux yaong kaung: yaong: ting: man rai khaix heue. Māwh kheu:
22
caong kuan man: rai kix tix kid kaing: pui pa hoek tix tawx gha:
kīh jauh yam an: pui ang: lai tawx gha: kīh khaix heue.
Kīh līh khaing: Vax
Tax yax ang: tawng.
Gawng ang: kīh koe:
Līh awm: pui aw:.
Ih kīh ding khaw, phaw: lox pie ngaing:
Daing: nyawm taux jao kīh
Taux ang: koe: kīh līh tix nai:.
Saux ang: pai: māwh grai: pui.
No comments:
Post a Comment